والنهارده هنقولك بعض الأفكار اللي ممكن نستخدم فيها بواقي الأرز والمعجنات والحلويات...

بواقي الأرز:
لو عندك بواقي أرز ممكن تعملي به حاجات كتير؛ زي:

- صينية الأرز بالخضار والبشاميل: ممكن ترصّي طبقة الأرز في صينية مدهونة بقليل مِن الزبدة، وتحطّي عليه طبقة فراخ متشوّحة مع الخضار والبصل والثوم والملح والفلفل، وبعد كده حطّي طبقة ثانية من الأرز وعليها طبقة بشاميل، وممكن تحطّي على الوش جبنة رومي أو جبنة موتزاريللا، ودخلي الصينية الفرن، وسيبيها لمدة نصف ساعة، أو لغاية ما الوش يحمرّ.

- أرز بالبيض والجبنة الشيدر: ممكن تحطّي بواقي الأرز في حلة فيها كمية صغيرة من الزبدة، وتقلّبيهم مع بعض على النار، بعد كده اعملي فتحات صغيرة في الأرز، واكسري في كل فتحة بيضة، وحطّي عليها شوية فلفل أسود صغيرين، وغطّيها بطبقة جبنة شيدر، وسيبيه على النار لغاية ما تحسّي إن البيض استوى، وممكن تحطّي على الوش طبقة جبنة شيدر أو جبنة موتزاريللا وتدخليه الفرن.

بواقي المعجنات
- بقسماط ناعم ببواقي الفينو.. لو عندك بواقي فينو؛ ممكن تحمّصيه في الفرن وتفرميه وتعمليه بقسماط ناعم، وتستخدميه مع البانيه والبفتيك.

- أُم علي ببواقي الفطير.. لو عندك بواقي فطير ممكن تنشّفيه أو تحمّصيه في الفرن، وتعملي به طاجن أم علي.

- بواقي العيش لصينية الفتة.. بواقي العيش البلدي ممكن تقطّعيه قطع صغيرة، وتحمّصيه في الفرن وتجمّعيه وتعملي به فتة.

بواقي الحلويات
لو عندك بواقي كيك ممكن تجمعيه، وتعملي به كرات الشيكولاتة، ودي طريقتها سهلة جدا، كل اللي عليكِ إنك تقطّعي الكيك قطع صغيرة، وتضيفي عليه أي صوص زي صوص الكراميل أو النسكافيه أو القهوة أو أي عصير فاكهة؛ زي الأناناس أو البرتقال؛ علشان يضيف للكيك ترطيب ونكهة جديدة، وبعدين شكّلي الخليط ده كور صغيرة، وجمّعيهم في طبق، وحطّيهم في الفريزر لغاية ما يتجمّدوا، وبعدين سيّحي شيكولاتة واغمسي فيها الكور دي، ورصّيهم في طبق التقديم، وممكن تزيّنيها بالكريم شانتيه أو بأي صوص تحبّيه.