سلطة البرتقال
المقادير:

• 4 ثمرات برتقال بلدي، مقشرين ومقطّعين حلقات عريضة
• 3 ملاعق بقدونس مفروم
• 1/ 4 كوب زيت زيتون
• ملعقة عصير برتقال
• بصلة حمراء مقطعة حلقات
• 2 ملعقة روح البرتقال (هتلاقيها عند العطار)
• مكسرات للتزيين (حسب الرغبة)

الطريقة:
1- قشّري البرتقال وقطعيه حلقات عريضة، وحطّي الحلقات دي في طبق، وضيفي عليه حلقات البصل والبقدونس.

2- في طبق ثاني اخلطي زيت الزيتون بعصير البرتقال وروح البرتقال، وبعد كده ضيفيه على حلقات البرتقال بالبصل.. وبالهنا والشفا.

شوربة لسان العصفور بالبرتقال والزعفران
المقادير:

• 1/ 4 كوب ماء
• 3 فصوص ثوم مقطعين شرائح
• 2 حزمة كُرّات مقطّعين
• 1/ 2 كوب لسان عصفور
• ملعقة كبيرة زعفران
• 1/ 4 كوب زيت زيتون
• كوب عصير طماطم
• كوب عصير برتقال
• 2 مكعب مرقة دجاج
• 1/ 4 كوب أرز
• عيش محمّص للتقديم

الطريقة:
1- انقعي الزعفران في الماء لمدة ساعة.

2- اقدحي الزيت في طاسة على نار متوسطة الحرارة، وضيفي عليه الثوم والكُرّات مع التقليب لمدة 5 دقائق، أو لغاية ما الكُرّات يذبل.

3- ضيفي على الخليط السابق لسان العصفور، وعصير البرتقال، والأرز، وخليط الزعفران، ومرقة الدجاج على النار؛ لغاية لما الخليط يغلي، وبعدين قلّلي درجة الحرارة وغطّيهم لمدة 25 دقيقة، أو لغاية ما الأرز ولسان العصفور يستووا.

4- بعد كده ضيفي عصير الطماطم وقلّبي المكوّنات كلها مع بعض لمدة دقيقتين، وتبّلي الخليط بالملح والفلفل، وبعد كده اطفي عليها، وقدّميها مع العيش المحمّص.. وبالهنا والشفا.

فراخ بالبرتقال
المقادير:

• 2 فرخة كل واحدة فيهم كيلو ونصف
• 4 برتقالات
• 1/ 4 كوب زيت زيتون
• 1/ 4 كوب عصير ليمون
• ملعقة صغيرة سكر ناعم
• 1/ 4 كوب بقدونس مفروم

الطريقة:
1- سخّني الفرن على درجة حرارة متوسطة.

2- قشّري البرتقال واعصريه، وشيلي 3/ 4 كوب منه على جنب.

3- ابشري قشر البرتقال وحطّيه ما بين تجاويف الفراخ، وبعدين غطّي الفراخ بزيت الزيتون، ورُشّي عليها الملح والفلفل.

4- حطّي الفرخة في الفرن، لغاية ما تستوي وتنزل المية بتاعتها، وبعد كده طلّعيها وسيبيها لغاية ما تبرد، وبعد ما تبرد اخلي الفرخة من العظم والجلد.

5- اخلطي 3/ 4 كوب عصير البرتقال مع عصير الليمون، والسكّر، والملح، والفلفل كويس جداً.

6- حطّي الفراخ في طبق التقديم، وممكن تعملي أرز بالكاري وتقدّميه مع الفراخ، ورشي خلطة عصير البرتقال على الفراخ من فوق، وزيّني الطبق بالبقدونس في الآخر.

كيكة برتقال من غير دقيق
المقادير:

• 2 برتقالة
• 3 بيضات
• كوب سكر ناعم
• 3 كوب لوز مطحون
• ملعقة بيكينج باودر
• ملعقة فانيليا

مقادير شربات البرتقال:

• ثمرة برتقال
• 3/ 4 كوب سكر ناعم

الطريقة:
1- سخّني الفرن على درجة حرارة متوسطة.

2- ادهني الصينية اللي هتعملي فيها الكيكة بكمية صغيرة من الزبدة السايلة.

3- حطّي البرتقال بالقشر بتاعه في حلة وغطّيه بماء بارد، وحطّي الحلة على نار متوسطة لغاية ما المية تغلي، وسيبيه على النار لمدة 15 دقيقة، وبعد كده ارفعي الحلة من على النار، واهرسي البرتقال وشيلي منه البذر.

4- اضربي البيض بالسكر مع بعض في وعاء لغاية ما يتجانسوا مع بعض، ويبقى قوامهم زي الكريمة.

5- اخلطي البرتقال المهروس مع اللوز المطحون والبيكينج باودر مع التقليب؛ لغاية ما يتجانسوا مع بعض، بعد كده صبّيه في الصينية المدهونة بالزبدة.

6- دخّلي الصينية في الفرن لمدة ساعة أو لغاية ما تستوي، وعلشان تتأكدي إنها استوت، اغرسي فيها سِنّ السكينة؛ فإذا خرجت نظيفة؛ فده معناه إنها استوت، وبعد كده طلّعيها من الفرن وسيبيها تبرد لمدة ربع ساعة.

أثناء الوقت اللي هتسيبي الكيكة تبرد فيه، ابدئي في تحضير شربات البرتقال؛ ودي طريقة تحضيره:
1- ابشري البرتقالة؛ بحيث إن القشرة البيضاء اللي تحت تفضل موجودة على البرتقالة، وبعد كده اعصريها وشيلي منها البذر.

2- حطّي بَشْر قشر البرتقال في حلة فيها ميه مغلية، وسيبيه لمدة 5 دقائق، وبعد كده سيبيه لغاية ما يبرد.

3- ضيفي عصير البرتقال والسكّر على القشر، وحطيهم على نار هادية لمدة 3 دقائق، وبكده تكوني خلّصتي تحضير الشربات، وتقدري تضيفيه على الكيكة بعد ما تبرد.. وبالهنا والشفا.

وبكده نكون خلصنا وصفاتنا البرتقالية الجديدة..
يا رب تجرّبيها وتعجبك..
وهاستنى تقولي لي رأيك..